Thor: The Dark World (雷神奇俠2: 黑暗世界) - 娛樂性豐富

純粹個人喜好, 查實Marvel幾位已拍成電影的英雄人物當中, 本人對"雷神"最無好感, 總覺得既然稱得上為無敵的"神", 很多劇情實在'搵戲來做'...

那何解又去睇第二集? 因為已睇過第一集, 要繼續睇落去...

結果, 又發覺第二集雷神都幾好喎.

有無睇過第一集並不重要, 可以當一齣新故事來看. 難得劇情有頭有尾, 表達清楚, 而且節奏流暢, 觀眾容易跟上.

是次劇情穿插多個場景, 再加上打鬥, 有大量CG鏡頭, 效果相當不俗. 本人看的是2D版, 不知道3D效果如何, 不過CG鏡頭已令人看得賞心悅目, 3D與否並不重要.

看這類片種已不會理會劇情合理與否, 所以沒有甚麼可評論. 角色方面, 兩位男主角Chris Hemsworth 及 Tom Hiddleston表現合格有餘, 個人反而覺得 Natalie Portman 的角色實在無甚麼發揮可言, 甚至比上集更'花瓶', 有點可惜.

電影尾段特意叫觀眾留下睇幾十秒的片段, 兩年後實有第三集...

今集娛樂性豐富, 觀眾一定收貨.

78分

Prisoners (罪迷宮) - 一路睇一路估

數個月前已經從不同渠道得知 Prisoners 好評如潮, 加上有兩大型男Hugh Jackman及Jake Gyllenhaal做主角, 令人十分期待.

抽下水先:"為咗搵番個女,你可以去到幾盡??" - 這一句, 就是故事的開始, 亦是故事的重點.

Prisoners 最精彩的, 絕對是扣人心弦的佈局. 大家一路睇一路估兇手是誰, 以為Jake Gyllenhaal快將破案, 但又不斷食白果... 個人覺得最高明是到最終開估的時候, 才令觀眾發覺中段出現的每件案原來都有關連.

不過可能我入場前期望太高, 結局反而不覺太震撼; 不過仍要一讚此片的橋段及情節沒有胡亂堆砌, 過程合理.

近兩年可謂Hugh Jackman的豐收年, 除了招牌狼人外, "孤星淚"令人知道原來狼人都唱得兩咀, 今次飾演為尋找女兒而執行私刑的父親亦很出色, 那種被'迫'出來的狠實在很到位.

至於Jake Gyllenhaal飾演獨行獨斷的警察同樣有火花, 本人執筆之時好像已經憑本片獲得不知甚麼地方的最佳男配角, 可喜可賀! 一提, 看過報導指Jake Gyllenhaal為本片增肥, 單看近鏡其實不怎麼樣, 反而影全身時才見到身型有點脹, 但仍然好型, 哈哈...

見影評有人讚飾演弱智青年的Paul Dano, 角色搶鏡; 另外飾演阿姨的Melissa Leo演出亦同樣不俗.

Prisoners 個人十分喜歡, 絕對值得入場一看.

85分

牛一 (尖沙咀篇) - 只恨九十分鐘時間不夠

打邊爐在香港盛行, 除了一口價任食外, 日式半自助shabushabu亦越來越多. 朋友早提過尖沙咀有新地方打邊爐, 最終幾番約定下, 搵個平日晚上試'牛一'.

'牛一'有訂座服務, 不過只接受六點或七點四十五分的booking, 其他時間一律只接受walk-in. 我們訂了七點九, 但都要等二十分鐘才可入座. 一提, 等位時已被要求選定湯底及肉類的選擇; 好處是入座後不用浪費時間考慮, 但壞處是給人感覺很demanding.

'牛一'地方很大, 座位亦很舒適, 自選配料佔很大地方, 連汽水櫃都有三個, 另甜品有兩部乳酪雪糕機.

是日點了最簡單/便宜的美國牛肉豚肉shabushabu, $138/位, 湯底則選了三文魚豆乳及蕃茄豬骨.

先講牛肉, 鮮紅的顏色'睇落'不錯, 油脂分佈OK, 食落亦不覺太肥, 肉味濃. 豬肉同樣不俗, 個人覺得比牛肉好食! 肉類可免費任添, 但後加的肉明顯比首碟遜色, 不過可以接受.

其實'牛一'最令人滿意的並非肉類, 而是包羅萬有兼任食的配料, 尢其丸及蔬菜的種類均比同類店舖多, 而且夠新鮮. 另外麵的種類也不少, 放在檯上的賣相亦見心思.

熟食方面除了有小食, 還有炒飯及咖哩, 只試了少少, 因為太飽肚喇.

甜品方面有自助乳酪雪糕, 更有雪糕配料專檯, 味道OK的, 不過重要是有得食有得'玩'!

最後一提, 火鍋並非加滾水, 是加湯的, 算是有誠意; 只恨九十分鐘實在不足夠呀!

Airwaves x Ironman 3 別注版

上星期行過7仔，發現香口膠Airwaves出了別注版，「復仇者聯盟」別注版。

「復仇者聯盟」已落畫多時，現在忽然出別注版，實在令人費解。

不過所謂的別注版亦只是包裝上印上各英雄人物的image，不見得特別。

反而見到有個「Ironman 3」鐵盒別注版，對，忽然又變成「Ironman 3」... 內𥚃包括三包18粒裝的Airwaves $29.9。

見個盒OK，最終入手；打開一睇，三包包裝只是普通包裝的Airwaves。

雖然計落個盒實際要付錢，不過覺得都可以接受；只奇怪為何「Ironman 3」已落畫多時但現在才promote...

茜廊餐廳 (德福廣場篇) - 食物不錯,價錢合理

到德福睇戲, 入場前嘆下午茶, 途經茜廊見menu都頗多選擇, 決定一試.

揀個豬扖蛋便當配碗仔翅.

碗仔翅濃杰適中, 都幾多料, 一般的味道, 無特別. 豬扖便當裡的豬扖尚算鬆化, 厚度OK; 不足是那'塊'炒蛋已完全熟透, 若'輕手'一點保留蛋汁撈飯就完美.

另點個公司三文治.

賣相幾好, 料亦足夠, 並非甚麼特別的味道, 但以'餐廳'來講這個公司三文治合格有餘.

食物質素不錯, 以餐廳環境來講價錢合理, 好評一個.

Luna Cake (K11篇) - 令人失望的crossover

Cheesecake, 小弟不是特別喜歡, 但總會買不同的出品試試.

近年出現越來越多不同的cheesecake團購, 有名氣又出現最多的團購有Cheeses, 另一間便是Luna.
兩間小弟都曾買團購(未曾幫襯正價,因為實在負擔不起), 亦曾在Openrice寫過一點愚見. 個幾月前見Luna有新產品出團購, 便立即買來試試, 近日終於可以攞貨.

是次團購有點特別, 是一個crossover, Luna Cake x 北海道蛋糕品牌 Shinori, 共提供四款產品, 可單買或一set買.

全部都試的話當然買一set $463.

1. 函館 Shinori 初雪芝士蛋糕
名叫'初雪', 當然是因為賣相似白雪覆蓋地上的雪景為賣點. 蛋糕分為兩層, 上層鮮奶油就像一層鬆軟的初雪, 亦即是一層厚cream, 甜度適中; 下層則為芝士蛋糕, 質地鬆軟, 入口即溶. 但問題是, 整體奶味重芝士味弱, 似在食cream多一點; 而且實物與相中的蛋糕有落差, 十分失望.

2. 函館 Shinori 特濃芝士條蛋糕
是次較為OK的產品. 據團購介紹這個一盒五條的cheesecake賣點是加入了少量檸檬汁... 可惜入口一點都嚐不到, 味道與一般的cheesecake無異, 芝士味適中, 質地尚算夠滑,但總括來講就是OK無特別.

3. 函館 Shinori 半熟芝士梳乎厘
4. 函館 Shinori 半熟朱古力梳乎厘

第三及第四項屬同款不同味產品, 半熟梳乎厘, 一盒得四個. 首先實物較團購裡的相片介紹細件, 興奮立即減半. 芝士味OK, 但朱古力味那件嚐不到芝士味(被朱古力味蓋過了); 另外質地過份鬆軟, 無法整件拎上手, 一掂即散. 食落似一件芝士味/朱古力味的濕蛋糕多一點...

一句講完, 是次crossover產品無論賣相及味道均令人失望, 負評一個.

Gioia by Chi (九龍城篇) - 平平無奇

在香港, 走高檔路線的餅店實在越開越多, 而簡單一件凍餅的價錢也越來越貴, 動輒四十甚至五十蚊一件細細的西餅究竟是否值得? 這一直是我很想找的答案.

又認識多一間西餅店, 位於九龍城的Gioia by Chi.

是日專程拜訪, 由於從未食過所以請店員介紹. 店員話每隔一段時間便會轉系列, 但有幾款長期高居人氣榜三甲, 一於就試那幾款.

Rose Yogurt - 以賣相來講絕對No.1, 粉紅色正方磚上有一粒大'珍珠'(白朱古力製成, 空心)及'玫瑰瓣'(同樣以朱古力製成). 老實講, 本人不太buy這兩件裝飾品, 因為過甜. 反而下面的四方磚質地軟滑討好, yogurt甜度OK, 中間雖有士多啤梨醬增加口感但偏甜. 一般.

Fresh Fruit Surprise - 美麗的名字, 其實只是件什果拿破崙. 評拿破崙, 當然要講酥皮. 這個酥皮很有趣, 有點漲卜卜的, 可以看到中間重疊多層. 入口夠脆, 吉士甜度適中, 至於頂層則有少見的熱情果片, 不過估計生果舖排是隨意吧. 對於這件拿破崙, 個人覺得OK無特別, 只可以話做到拿破崙應有的要求.

Raspberry Cheesecake - 店員介紹時說:"內裡包含raspberry, 所以食落不會覺得'漏'". 聽完後我心諗:"這麼細的一件cheesecake又可以有幾'漏'呢?"... 結果一如所料, 這件cheesecake實在平平無奇得很, 個人甚至覺得cheese味不夠濃... 至於內裡那粒raspberry, 食落與放在頂層的raspberry效果一樣; cheesecake質地反而OK滑, 但整體仍然令人失望.

Tea Time (忘記了tea乜乜) - 以為是抺茶, 但店員更正是茉莉花茶. 這個更令人失望, 一句講完: 蛋糕質地太硬, 入口太乾.

總括來講十分失望, 尢其cheesecake及茉莉花茶蛋糕, 個人覺得$39一件完全不值; 至於另外兩件亦只能說勉強合格, 但亦非甚麼必食蛋糕.

平平無奇的質素, 又貴, 換來負評一個.